20090912家常便飯＠TKO

食飽返到屋企，止完血就坐車直入TKO。

係街市魚檔買完貴妃蚌之後，見到有啱啱坐完飛機送到的賴尿蝦，即刻就買咗啲返去食。

由於Mr.G上次投訴夜食飯，今次實行開行Turbo係兩個半鐘煮好餐飯。

涼伴蘆筍。蘆筍用鹽水加酒灼熟，用冰水急凍後瀝乾放入雪櫃。食時沾沙律醬食用。

金蒜粉絲蒸貴妃蚌。用加咗味的粉絲及金蒜清蒸。

美極金蒜賴尿蝦。賴尿蝦開半之後上少許粉，用嫩油先泡至八成左右盛起，再用猛油回鑊後盛起，用牛油起鑊，加入糖、蔥頭粒、金蒜及辣椒粒拌勻，再加入賴尿蝦拌勻，最後加入美極。

一般家用爐頭都好難煮呢個餸，火力唔夠好難一次過煮，分多幾次就好花時間．．． 

紫蘇炆雞。先將雞件用生抽、老抽、糖、鹽、味醂、料酒及豆粉醃一小時左右，再將雞件爆炒後盛起，用蔥頭、蒜瓣、辣椒及薑片起鑊，加入豆豉後贊酒，再加入雞件轉慢火燜廿分鐘，加入紫蘇拌勻後加蓋焗數分鐘。

現在好難搵到啲靚雞食，成日買到啲雞都係好多肥油，見到的都已經切走晒，但係煮完出來都仲有好多剩．．．

絲瓜炒牛肉（呢味係C小姐煮的）。

後記：都唔明典解有人以為我唔煮中菜的，另外乒乒好鍾意食賴尿蝦．．．