SNG Life: 如何選購相機

成人比人問呢個問題，都係先答一大堆問題先啦：

一、預算比幾多錢先。呢個問題係幾複雜的，可以係一部機的價錢，亦都可以係你／妳會洗幾多錢落去個系統。

二、有冇品牌偏好。有些人冇特定喜好的，但會對某一隻特別憎的。基本上市面上日系的相機都冇乜邊部差，差別在於賣幾多廣告同有幾多粉絲。大路牌子的配件容易搵，其他的就難啲啲，不過知情的就唔係太難。各取所需啦。

三、相機的大小。主要係體積同重量的關係，有啲人要方便，有啲人做苦力都冇問題。有時體積大小買個陣都唔覺，但用耐咗就唔會帶出街，量力而為啦。你／妳可以自己睇下平日出街去旅行會帶幾多隨身物品就可以估計到多一件野對你／妳的影響有幾大，而答案就可以幫助揀DC定DSLR，不過仲未可以下定論住。

四、拍攝的題材。呢個問題問個個人都係越多越好，如果有的話使乜出咁多部呢，除了影快速移動的主體及昏暗的景色外，DC係可以做得晒的，如果夜間拍攝的要求唔係極高，DC加腳架用低ISO都可以勝任。

五、唔係一定用DSLR先會影到靚相。一部輕便易用的DC都可以影到好的相片，只要好好地發揮及使用部機的性能就可以啦。一張好的相片最重要的係時機，構圖跟曝光都係其次(當然有就完美啦)，如果拍攝人像的話，要Set一輪再去拍一張的話，乜野Mood都冇晒啦。

六、會使用的拍攝模式。現在相機的內置程式（全自動 (Full Auto) / 內置模式 (人像、風景、夜景、微距等等) ／　程式(Programme)）已經好完善啦，一般唔識影相的人（光圈、快門、ISO都唔識的）跟住做基本上都會拍到一張幾好的照片。有要求的就要花點功夫去用ASM（光圈先決、快門先決、手動）。有些高階少少的DC都已經有齊呢幾個分唇，仲有啲有埋手動對焦的。

七、當然DC可以取代DSLR係冇可能的，但真係新手都係唔好買會比較好，買機係唔會送技術的。

　　DC的優勢在於小巧及靈活，在人多的地方會方便好多，特別係唔會吸引別人的注意；而DSLR的優勢則是相片質素會比較好，不過都要使用者懂得去操作部機才可。

　　一般人點解會覺得DSLR影人會比DC好，其主要的原因是景深及透視變形兩項。DC由於感光元件比較細小，鏡頭所用的焦距也相對的短，拍出來的相片好容易就出現好長的景深，即係前後景物都清晰，呢類相片已經深入民心，所以一用DSLR拍一些人像相片時，因為長焦距、大光圈及近距離的關係，好容易就拍出一張淺景深的相片，即係一啲眼清，耳朵開始唔清，背後景物混埋一堆的相片。對於普羅大眾來說呢一類相片係好少見的，當然係耳目一新啦，所以大部份轉玩DSLR的都會追求呢種拍攝效果。相反要DSLR拍一張全景深的照片係一件幾困難的挑戰。

　　另一方面，由於視角的問題，用DC拍人像時由於相機跟被拍攝者的距離相對地近，短焦距的鏡頭拍出來的相片會出現透視變形的現像，極端例子就係大頭狗。而用DSLR的話由於拍攝距離比較遠，透視變形的問題會冇咁明顯。當然有好多人喜歡玩呢類特別效果啦。

八、買新機切忌即買即用，特別係DSLR。某些人以為相機跟家電一樣，一開即用，說明書都唔洗睇，這些人通常係因為某些特別Event才會去買的。係本地都仲好啲，如果部機有問題可以即刻返去換，最怕就係出國啦，到時都唔知點算好。我以前都試過，買部機返來係上唔到菲林的，就係試機個陣樣樣都試晒係冇試呢一樣。仲有上機前一日（菲林時代）買咗枝wide-angle，人總是貪心的，結果影到老婆變咗大頭狗咁