20081207的晚餐@第一次開爐煮（更新）

SNG廚房再度開業

出街食咗一個星期晚飯，老婆終於頂唔順，話要係屋企開飯。

下午三點幾食完午飯就去吉ｘ島買定啲後備食糧，再去街市買是日晚餐的食材及配料如薑、蒜、洋蔥、紅蘿蔔及西芹。

第一樣整的食物係高湯冬筍，可能仲未係時候，啲筍都仲差少少。

是日晚餐係帶子大蝦意粉，當然有好耐冇飲過的白酒啦。

本來係想整白汁底的，但個廚房真係唔識用，一餐飯玩咗成三個鐘，當中包括洗晒所有碗碟及四隻煲同鑊．．．

今日仲有一個創舉就係將廚房入面所有新電器一次過開啟．．．

電爐的火力仲未掌握得到，十二度火力加埋booster分得好仔細，煮多幾餐都唔知控唔控制得好。不過呢款爐個火力調教做得幾好，可以即刻將火力調至一、六、十、十二及booster，雖然冇推桿式或旋紐的咁直接，但都已經好好用啦。

個抽油煙機的款式研究咗差唔多有十年，比想像中的較能高好多（當然氣喉的長短影響會好大），雖然得兩個唔係好快的速度，但抽味能力極高，唔係大火煎蝦行後兩步都嗅唔到味道，另外真係靜到估唔到，開慢速時根本聽唔到聲，到第二日煮早餐時先知開咗部機．．．開快速時當然有聲聽啦，但係廚房內談話時不需要提高聲浪。

部洗衣機就可以說是非常簡單，全部係程式控制，選好後不用理會其他野。之前部機係六百轉乾衣的，今次呢部有八百轉，洗完出來的衫褲比六百轉的乾好多但又唔皺。