20081218的晚餐

是日夜日倒轉咗，十一點幾訓，四點唔夠就起咗身。落街食咗少少野就去街市望下有乜食。發現好多游水墨魚都係廿幾蚊一條，不過唔想開油鑊就放過佢地啦。

見啲大頭蝦好大隻，買咗兩斤返來，啲殼就煮咗個蝦湯底，啲肉留咗四尾蝦比冬蔭公湯用，其他就整咗蝦膠明天食。

是日晚餐又係臘肉薑汁炒芥蘭、高湯浸冬筍、冬蔭公湯及芝麻斑西京燒。

飲完冬蔭公湯之後啲痰都鬆咗啲，冇咳得咁辛苦。

昨日叫大小姐幫我打咗啲杏汁，因為依家冇攪拌機用，等遲少少時間先去買返部返來用。隔咗渣之後就加蛋白、奶及冰糖整咗個杏汁蛋白做甜品。

第一次做效果唔係咁好，下次再改良下啦。

Kelly媽：焗透啲飯應該係面頭比較乾水而底下會濕少少，攪勻之後就剛好啦。