20081216的晚餐

今日病倒，係屋企訓咗大半日。去街市買咗幾隻薯仔，煮埋啲隔夜餸又一餐啦。

白汁蟹肉焗薯蓉及香草焗雞翼。太耐冇醃雞翼，唔記落漏啲乜，欠咗啲甜味。

用牛油、麵粉、牛奶、三湯及忌廉開咗個白汁，用電磁爐煮比用明火更容易控制個火力平均啲，唔會細火時只集中係煲中間，冇起粉粒及濃底。

上次食剩蟹腳及蟹膏，拆好蟹肉發覺有少許腥味，加少少黑椒碎醃片刻，先用油爆香蟹肉後再加少許拔蘭地去腥。之後就炒洋蔥碎、蒜泥及蘑菇片，再加入蟹膏及將蟹肉回鑊，用鹽及胡椒粉調味。薯蓉用咗少少鹽、糖及忌廉調味。薯蓉舖底，放上蟹肉，再舖上白汁，最後灑上芝士碎。今日個味覺唔好，唔夠膽落重味，只靠蟹肉及蟹黃本身的鹹鮮味帶起整體的味道。

飯後生果。