20081031哈佬餵@大小姐屋企

是日唔知點解大小姐叫晒大家一齊上去玩家家酒。經過一輪相討之後，大家決定食大閘蟹及滷水鵝。

十一月麥太走去買咗五隻羊登胡蟹。

大小姐一早浸定啲蘿蔔。

買咗半隻鵝切片。

再加啲豆腐及鴨腎，買鵝時送咗啲好味菜甫。

仲有大小姐焯的芥蘭。

本來用花甲肉來炒意粉的，但係比一粒老鼠屎搞掂咗啲老翁。結果得返澳洲帶子肉、蘑菇片、紅燈籠椒粒、蒜泥及洋蔥碎來炒。

都好耐冇炒過咁大碟意粉啦，都有成三分二包意粉。意粉先用大量重鹽水煮好，炒的話要比包裝建議的時間少一分鐘左右，盛起後如果唔係即炒就要加返少少煮意粉水打散，等啲意粉唔好黏埋。

今次用咗罐頭蕃茄煮個茄汁底，都係先炒香洋蔥碎及蒜泥，再加入蕃茄膏爆香後加入拔蘭地(因為冇紅酒)，再加入罐頭蕃茄，然後用黑椒碎、鹽及糖調味，再加入意大利雜香草，用中慢火煮至杰身就盛起備用。

用少許油輕炒紅燈籠椒粒後盛起，再略煎帶子至八成熟盛起，再用少許油炒蘑菇片至軟身，加入意粉炒至乾身，中途要加少許煮意粉水保持意粉濕潤，但份量唔可以太多，將茄醬加入拌勻及調味，再將帶子及紅燈籠椒粒回鑊拌勻即可。

第一次煮呢隻別街牌意粉都有啲驚，驚好似以前食個啲咁糊口，好在呢隻個樣好似好腍身，但係都仲有啲咬口。

有蟹食當然有白酒飲啦，十一月麥太係德國買回來的，酒精唔係好夠。

蒸好啦，隻隻都好靚，不過食蟹係我的死穴，最怕係食到成手都係又要用手去攞酒飲，同攞筷子食其他餸。最後都係一次過拆晒啲肉當蟹粉食

仲有神秘甜品。