20081108Dinner@炙爐端燒

玩咗一日，唔返屋企食啦，走咗去北帝街食日本野。都有一段好長時間冇食過爐端燒啦，老婆見有間舖"新"的爐端燒，於是又走去食吓。

先上一碟前菜，用湯浸菠菜，再加上木魚碎。

叫咗一份串燒便當試下，入面有串燒雞肉、牛肉、鰻魚、明太子釀雞翼及燒飯團，仲有一碗麵豉湯。串燒雞肉及牛肉唔好食，雞肉有渣，牛肉肉質唔靚，燒出比較來靭。鰻魚本身冇乜味，皮夠脆，點少許汁及加少少山椒粉就可以啦。

另外再加咗雞軟骨及手打墨魚棒。正常合格的燒雞軟骨及墨魚，其實要整得特別好食真係好難的。

燒牛舌，火喉控制得好好，外脆內軟，不過如果用些更靚的牛就完美啦。

有驚喜的日本青椒仔釀蝦膠，本身呢種青椒有陣苦澀味，唔係個個人都喜歡食，但我自己就好喜歡啦，釀咗啲蝦膠之後就去咗啲蝦膠吸咗啲苦澀味，整體感覺非常好食。

燒扇貝都唔錯。

海蝦用黑豚肉包住隻蝦，而蝦身開背去腸的位置就釀入芝士，整體感覺好好食，因為唔用煙肉，冇咁鹹。

食完之後就再加多幾味餸。有好好食的燒河豚乾。

燒薯仔，薯仔烚好之後中間加入牛油再燒，值得一試。

燒蕃薯，過咗啲火。

最後一味燒銀杏，加少少鹽，不過啲鹽就普通咗少少，銀杏就非常好味。