母親節聚餐(下)

返到屋企都中午啦,十點半先食早餐,午餐遲啲食都得,雖然魚檔幫兩條魚起咗皮同背刺,但係返屋企都要大半個鐘頭先至去得清啲內皮,起肉同切件,再洗洗切切醃醃之後都成三點鐘.之後就起程去旺角買餸,點知條路又唔生性,玩塞車,成九個字先至到.

行咗一個圈,搵黎搵去都唔見啲大隻小小嘅龍蝦,都係斤零重,六個人食兩隻又唔係好抵,兩個頭都去咗一大件.最後買咗隻兩斤二,同埋加咗六隻超大賴尿蝦.由於時間緊迫,於是我自己返屋企處理埋隻龍蝦先,老婆就去附近街市買埋啲零碎配料.點知支解完隻龍蝦之後,老婆都返來啦說:我買咗啲好靚嘅"小棠"菜同鹹肉返來,個蠶豆唔用來炒啦,轉做菜飯啦.哈哈,個菜單唔同晒囉.

呢個本來係最後版本,但個沙拉買唔到材料,多咗隻賴尿蝦同菜飯,到要起個時蔬已經好飽啦,冇煮到.由於起菜慢,連雪櫃入邊個幾隻醉雞翼小食都比人食埋

(今個禮拜又要整過其他啦).

九個餸有四個係新整嘅,一邊要睇食譜一邊煮,做到個頭都出晒煙,好在都入得口.

全晚之最:

最輕鬆嘅係隻烤鹽焗鮮雞,做過幾次,行自動波都得.

最危險嘅係椒鹽賴尿蝦,用半鑊油炸熟啲賴尿蝦,油花四濺,不過有一樣武器對付--鑊蓋,哈哈.

最"段估"嘅係螺肉炒雜菌,唔得閒睇個食譜,用直覺去煮,又幾好食喎.

最失敗都係個腐皮卷張腐皮大硬,材料問題,但個餡就非常好味...梗係啦,用之前用剩啲花膠炆鵝掌的汁料去煮喎

.

最誇張係飲咗兩枝香檳,一枝白酒,半枝甜酒同埋唔知幾多罐啤酒,不過我飲得好少,要邊食邊煮嗎

.

唔好問我個幾句日文寫乜,我唔識睇,應該唔好得去邊啦.