20080920的晚餐

自從爹娘星期二返咗鄉下飲之後，今晚係第二晚係屋企煮飯。星期二係creamy屋企攞返包羊柳返屋企煮咗碟失敗的菜芯炒羊肉之後，今晚都係用返洋蔥來炒好食好多。本來打算買大蔥的，但係sogo得啲日本版，妹仔大過主人，只好用洋蔥作配料。羊柳兩條起雙飛，羊肉用曬油、生抽、蠔油、糖、胡椒粉及酒醃片刻，（應該要落生粉的，但係唔記得）。洋蔥一個切絲，炒香後盛起，再大火炒羊肉至七成熟，中途加小許水去炒，再將洋蔥回鑊，最後埋芡及加小許麻油。有少許黑色係因為炒完洋蔥冇洗鑊。

另外今晚又玩炒菜芯，之前好多時都係出術將啲莖拖一拖水先再炒，但係今晚就先用薑片起鑊，再將啲菜莖炒至八成熟後再加入菜葉去炒，用少少酒去啲菜青味，再用鹽來調味。係屋企玩炒菜係一樣體力勞動，主要原因係個火唔夠力，要炒得好就要不停咁炒唔停得，否則就好易焦，炒成五分鐘食咗都補唔返．．．食開魚露炒再食返鹽有點唔慣．．．

大熱天時都係飲杯白酒舒服啲。