20080919的晚餐

是日不用外出工作，所以有體力夜晚玩家家酒。玩家家酒當然係去人地屋企玩好啦，下午去咗吉ｘ島買咗兩件米国西冷，再加一對日本桃。收工就急急去大埔街市買海鮮，唔知係唔係個天黑快咗，七點準時間間店舖都關門。

金蒜銀絲貴妃蚌。24蚊一斤好大的貴妃蚌，自己落手揀咗八隻去晒水都要二斤半，Creamy媽整咗啲金蒜，加啲撈咗糖及豉油的粉絲及冬菇一齊蒸，蒸熟後加啲蔥花及熟油。

買咗條細鱗，25蚊一條有斤二両左右。用蒸氣微波爐蒸，蒸熟後加薑蔥絲及熟油。Creamy媽要Calibrate返個對換表先得，好在條魚過咗火都唔係咁大問題（P.S.：太平洋個Sales話蒸爐過咗火唔似用鑊蒸咁）。

煎咗兩件米国牛，由於麥氏要食熟啲（話七成喎），加上件牛比較薄身，煎得唔係咁好，八成接近九成左右。

用豉油炒菜芯。個火控制得唔好，水咗啲

飯後果係兩個日本直送的桃，遠睇個牌以為係42蚊一個，老花眼睇唔到個細字係兩個，平平地買兩個返去食啦。