慶回歸十週年的一系列慶祝活動...下

睇完一場"娛樂"之後，正式進入正場啦，拜仁慕尼黑對聖保羅（青年軍），名氣就夠啦，不過人腳就差好多，歐洲聯賽放暑假，巴西又只係青年軍，算啦，唔使錢又有野食就冇乜要求啦，對面看台都有八成滿（新聞話３萬８）．

比賽前都有啲球員出來熱身，最有興趣都係佢，大猩猩，睇埋今年都應該退休啦．簡尼，德國近十幾年最好的一個門將，除咗世界杯之外其他大大小小的獎杯都攞晒，但係我唔鍾意佢．

出黎接兩邊的傳中球．

熱身完後一陣就列隊出場，主球證係萊利，一位係英格蘭地位很高的球證，不過最近一次來香港都唔係吹得咁好．

例牌大合照，影後．

準備開波．．．

簡尼飛身打出射球.

球證最威嚴的一刻.

經過上半場比賽之後，明顯見到聖保羅活力夠狀態足，拜仁就組織性強，但係冇乜邊個係在狀態，上到前場就有心無力，結果要走番轉頭．拜仁下半場改用死球戰術進攻，始終呢啲戰術比較容易把握，有一次拜仁五打二都都入唔到波．．．

傳統巴西的死球．．．直射．．．出界．

角球用高路斯的長處進攻，不過龍門對手夠長．

領先二比一的一球．．．省中人場入波．

個結果係聖保羅青年軍唔夠經驗，下半場比拜仁有一段時間控制咗個比賽節奏，仲要係用最悶個隻，攪到聖保羅啲後生仔跌晒watt，到落後之後再發力都趕唔切．

兩隊上看台攞獎牌獎杯．

整場波其實冇乜睇頭，不過可以見到成個隊形係睇電視見唔到的，前中後三線好緊密地亙相呼應，唔會有各自搵食個種鏡頭出現，仲有一樣可惜就係個地太差，巴西啲球員玩變速就好多時都跌咗係度，小咗一樣攻勢就無乜野可以睇啦，最後香港啲球證真係唔得，睇越位都唔準，我唔係直線都感覺到佢有兩次錯，一次吹越一次唔越，到個大電視重播就斷正，唉．

本來諗住走啦，但係又見到中田英壽同卡林保，咁就睇多陣啦．FIFA副會長帶領出場．

有冇發現紅衫有深淺呢，深啲就係香港球員，淺啲就係大陸．

唱國歌時候唔知點解要望向大鐘？？？

又係大合照時候．

有英文字個啲就係香港球員啦，冇乜邊個識，但係要留意４號小董，人怕出名豬怕肥，出咗半場就比人問候足半場．

因為太悶，所以都收好部相機冇影相．中國隊入個兩球波都好靚，但係就唔係贏得咁光彩囉，上下半場都唔同人，用足２２人打對面啲老人家，其實啲老野都幾勁，位置感好同保護皮球的能力高，相對中國球員的腳法唔差，但爆發力唔夠，咁點突破呀，唔係啲老鬼禮讓都入唔到第一球．有兩個黑鬼啲加速一流，話過就過，但持久力就不足，十多米左右就追得番（冇乜要求啦，如果仲得依家都仲打緊頂級球隊啦），中田英壽個視野好廣，放啲波都好要命，前鋒把握唔到就無計啦．下半場換入卡林保，殺波好準同狼，不過我睇睇發覺點解個場靜晒嘅．．．原來太悶，（之前上半場都仲有啲人玩人浪同打吹氣棒），於是香港人又用佢地對腳來投票，攪到出面啲差人都開唔切條加路連山道比人行．

後記：大球場的設計有好大問題，個頂係半密封式，看台後面封密晒，前面睇就好開陽，但係啲風就吹唔到入去，攪到個個都大汗疊細汗．