慶回歸十週年的一系列慶祝活動...上

六月三十日玩到午夜先返屋企，睇埋套卡通hea多陣都成二點幾，過咗第二個睡眠時間，攪到第二朝唔知醒起身去飲茶，約咗屋企人九點半係蓮香等，但係起身都九時正，最後都要十點三先到．

香港啲舊式茶樓越來越少，應該話都唔知有幾多剩，以往老竇好多時星期天都帶我地出雲天飲茶，細個就冇乜感覺，只係見到啲雀籠排晒係窗邊，有啲賣點心的就用頸掛住個大托盤，上面有一大堆蒸籠係枱邊穿插，有啲大叔就拿住個大水煲飛水加茶，當然少不免枱底下有個痰罐啦．至於蓮香樓，名就聽得多啦，由於自小就係新界長大，香港島好少過去的，一年十次都唔知有冇，仲有去親都係西環．．．

去到蓮香之後看到個門面就覺得冇乜特別，只可以話係老一派的茶樓，門口有啲茶葉及唐餅賣．上到去又可以感受到個啲係背脊等位嘅情景．去到剛有人離開張枱，咁樣成家人又可以坐晒一張枱啦．

好野，又有蓋碗玩，細個時由於隻手細同怕熱，好多時都攞唔起個蓋碗倒茶，不過依家就無難度啦．老婆一見到個蓋碗又記起某鬼佬品牌之前出的蓋碗，由於唔知道個碗唔係圓形，所以套碗係用唔到的．

由於遲咗半個鐘，家人都食咗幾轉點心啦，有食剩的柚皮鴨腳扎，燒賣，雞扎．．．

玩緊雙槓的燒腩卷．

開口的叉燒包．

後記：其實蓮香樓啲點心唔係十分好食，只不過係環境令人抅起咗一啲回憶吧．