今晚的晚餐

都好耐冇係屋企開大餐啦，今晚唔係好多人（共四位），所以可以慢慢玩．

第一樣係煎匈牙利鵝肝，法國就食得多，煎咁大塊匈牙利的都是第一次，上次係裁開件鵝肝時煎咗少少來試味，唔知係唔係太熱，鵝肝面有少少溶，要好小心上粉先可以煎，不過個味道比法國的更濃郁同更軟身，上枱時伴意大利黑醋．

第二味就係豉油王煎波斯灣中蝦，肉質較諗身但好甜．

煎焗紐西蘭羊鞍，中西混合醃法，上枱時伴薄荷醬．吉之島買的羊始終肉味差少少，但鬼叫土瓜灣街市冇其他野買咩，時間緊迫張就下啦．

正在過冰河的自家手打烏冬，今次有少少失手，一來個壓麵機調錯厚度，二來啲烏冬用的麵粉可能耐咗一點，個麵身比上幾次做的諗咗少少，上枱時伴冷麵汁．仲有一個係蒜泥炒蒜芯，冇乜特別同埋過咗少少火（飲咗酒煮就慢咗半拍），所以冇影．

最後生果係老婆係日本空運返來的佐賀縣產超甜溫室密柑，如果係MIC就一定唔敢食，甜度高到接近假咁．仲有超香的白鳳桃，手污冇影到．