今年第一次過大海（一）

星期五下午去澳門開會，由四點半開到六點半，之後就即刻去碼頭接埋老婆去食飯。

由於冇搵定酒店，澳門今天又特別多團來訪，便宜的房間都全滿，最後去咗氹仔住，反正都係瞓一晚，明早一早起身就退房，價錢比質素更重要。

入咗氹仔就唔會返過來，行過去官也街，又去返山度士食。呢間店舖來過很多次，似乎已經變成習慣，係氹仔多數都會來呢間，佢係一九八九年開，我應該係九五年左右開始食，附近當時都仲有幾家好食的，但回歸後好多都關了門，變成得返呢間澳葡菜入得下口。菜色比較平民啲，通常地下個層都係留返比啲葡人多，上層差不多張張枱都坐過晒。

薯絲炒馬介休。馬介休係我倆去澳門必食的食材。呢個餸做法比較家庭式的粗糙一點，但味道唔會太鹹，真正的葡國菜係比較鹹的。記得當年有次亦是唯一一次去隔離的木偶食一個馬介休炒飯，佢將原材料直接整碎去炒，跟本鹹到入唔到口，點處理馬介休都不懂就用來下菜‧‧‧

炒蜆。唔知點解係澳門食啲蜆比香港食的好味。好的材料唔需要特別花巧的方式去煮，蒜、白酒、檸檬汁就已經好足夠。

八爪魚飯。未諗過可以咁樣去整的，湯底係用上豆及豬骨，配合埋啲保羅及蝦又幾好食。

麵包兩隻。夜了一點來到，麵包冇咁好食。

青酒乙枝。