20100315的晚餐

今日個天好怪，一早起身好大霧，跟住就出陽光，收太陽個陣就又起霧，啲霧係唔夠廿樓的高度上面飄過。

又係老婆的大整古．．．

話要食八寶鴨．．．

話說去年年尾食咗隻唔係咁好食的八寶鴨，一直都想自己整來試下，咁啱早前煮糯米飯時有剩米，其他配料都仲有存貨，於是就試整一次來玩下啦。

人少食唔晒一大隻米鴨，買隻幾好肉味的加拿大水鴨來煮．．．

不過見好多食譜都係再起副鴨骨出來，自己從未試過唔開皮起骨的，於是上網看圖識字，好左有人講過鴨皮比較厚及有彈性，冇咁容易穿，咁都安心啲．．．見有個廚師話一個小時可以起八隻，即係個半字一隻，應該都唔係太複雜的事情來的．．．

大刀用唔上，只係用一把小刀，其實有把起骨刀的，不過只係用來切火腿，切生肉都係用返呢把算啦．．．

未開始先諗一次中學課文－－庖丁解牛

先係頸位弄斷個V字骨，再將左右的wish bone拆掉．．．拆緊先發覺wish bone的結構跟汽車的前懸掛系統係差不多的．．．點解當年學的時候冇人講．．．

最後用咗十五分鐘起完，冇穿皮

今早用老抽醃個皮，浸好糯米、冬菇、瑤柱及蝦乾就上班。

話就話係八寶鴨，材料就有九樣：栗子、鹹蛋黃、蝦乾、冬菇、瑤柱、蓮子、白果、金腿及糯米。樣樣少少都有好多野．．．

先用竹籤縫好頸的開口，再將一半炒好的材料填入鴨腔內，將鹹蛋黃放入，再將餘下的材料填入，用竹籤縫好尾部的開口。

原本食譜叫用滾水拖皮先再炸，但由於時間關係，直接下鑊淋油炸就算啦。炸完成隻鴨即刻漲起晒，油少啲色有點不均勻，下次再整多啲時間就諗諗計。

再燉兩個小時，大隻啲就要二個半到三小時。

加多一碟灼唐生菜又一餐啦。

其實淺色的部份已經炸起咗，只不過係唔夠色，因為油淺，貼住鑊的地方已經夠色，再炸／煎就會燶，下次真係要用個炸篩盛住來淋油先得。燉好之後鴨汁去油，另外再用小煲煮熱埋芡後淋上鴨面。

開．．．

入面個餡好好食，糯米爽身唔似出面食的咁糊口。

如果個鴨腔有醃過會更好食，燉時如果將鴨胸向下會更好。