20091121thxgiving@TKO

都唔記得邊個要食火雞，咁就揀咗美國感恩節前整來吃。

早一個星期已經買咗隻雞返來解凍，有十一磅重。

前一天忽然好忙，開咗成日會，都冇乜時間諗下啲餸菜點安排。

星期六上午整包包，下午返屋企攞埋隻大雞又入去TKO。

冇時間浸糯米，先用暖水浸泡片刻（應該要浸四小時的），再將開殼去皮後的栗子、瑤柱及蝦乾放在糯米面，然後用壓力煲煮熟。

另外，再用鮮Rosemary切碎（應該仲要加Thyme的）、岩鹽、黑椒碎、喼汁、洋蔥茸、蒜泥及橄欖油調勻，然後塗在火雞皮下面。

啲配料唔夠時間整，要成六點先可以開始焗火雞。

隻雞入咗爐，可以開始整其他食物。

Cranberry Sauce。用新鮮十二安士Cranberry加一杯鮮榨燈汁及一杯糖煮成。

個汁幾好味的。

蘑菇忌廉湯。都係先煮好個菜湯底，再用牛油炒香洋蔥碎及蒜泥，加少許麵粉，再加入蘑菇，再注入菜湯及牛奶。煮好後用攪拌器打碎，返熱後加忌廉。

大蝦沙律，唔知點解隻蝦會好鹹．．．

炸蕃薯及生蠔。用吉Ｘ島出的天婦羅漿炸本地蠔唔係咁好食，下次要開返個濕粉漿去炸。

清炒芥蘭。

Sangria

南瓜批。C小姐用麥維他及牛油整咗餅底。南瓜都係T用水煮熟，用KA打茸，加蛋、蜜糖、鹽、肉桂粉、薑粉（冇丁香粉）及忌廉拌勻成餡料。另外再用忌廉、蜜糖及薑粉打好伴吃。