20081018@裝修的第十三天

昨晚收到貨運公司的電話，話今天下午會到。朝早食完早餐，hea咗陣，中午時份就出去等，點知一落樓，司機話我批磚係頭車，個多鐘頭會到，即刻上火車出去啦。轉巴士落車不久，司機又打電話來話依家到上水，我估要七至八個字左右到，於是去食個午餐先。食完不久就見到沖天大火災，揍完熱鬧之後又收到電話話三分鐘後到。於是上去搵人幫手啦，點知得一個打雜係度，另一個泥水師傅當然唔會去搬啦。

不過唔緊要，我都預咗要自己上的，不過以我現在的體能，一個人天黑都上唔晒，有多一個幫手會快好多。一盒磚都唔少野，最輕的都有28kg，地磚就32kg，總共有1.7噸左右。約個半鐘頭左右上晒啦，我上咗五份二左右啦，因為都要比返啲個打雜做(世上冇免費午餐的)，最後個判頭到咗搬咗幾盒磚(唔洗驚，星期三仲有個浴缸比你玩，鬼叫你之前話幫我上磚呀)。

近的係廚房用的牆身磚，遠的就係廚房廁所用的牆及地磚，全部都係300乘600，三款唔同色。

一塊600乘600的地磚，呢隻磚比較重身，八公斤一塊，其他同大小的都是七公斤左右。

全屋用的地磚，左下為地腳線。

廚房用的牆身磚450乘300大。完來搬完野之後個腦係計唔到數的，啲血可能去唔到個腦度，計咗一排先知啲磚數目應該啱。

個泥水師傅做啲乜，咪係廚房廁所撻個datum囉(中文唔記得叫乜)，之後每個牆面的批盪就係依呢兩條平面去做。呢個工序好花時間同功夫去做，做唔好成個面會唔平。

大部份電掣位都已經收好口啦。

走前個判頭話要上浴缸啦，做完批盪及防水之後就要裝浴缸，之後就舖磚。見仲有時間，就坐船去對面轉地鐵去灣仔買埋個缸，星期三上午到。

記錄完畢。

新居日誌