20081007的晚餐

見某人都要久不久煮下，今晚就走去玩下啦。廳盞燈啲色都係怪怪地，用手機影就唔攪咁多啦。

改良版麻婆豆腐，加咗筍粒及冬菇粒，煮呢個餸差點命喪廚房，啲辣味真係氣都呼吸唔到。今日盒豆腐唔知仲乜，個邊位有啲蜂巢狀及少許散，可能比人雪過，下次叫阿媽去返超市買好過啦。豆腐、青椒及蒜頭切粒，冬菇切粒用糖及麻油略醃，筍就係罐頭切粒（我唔鍾意食罐頭的，不過係最後一罐就食埋佢啦），肉碎醃好味（唔知邊個醃的），將豆腐及筍汆水，先用油略炒肉碎後盛起，再爆香啲料頭，加入豆瓣醬、少許糖、蠔油及水，煮沸後將肉碎及餘下材料加入，蓋上用中火煮片刻，開蓋後兜勻再加麻油便可。

蠔油草菇肉片炒西蘭花，阿媽準備好晒，加少訐蠔油炒埋一碟就可以。

最後就玩一下炒牛奶，下午睇咗高師傅炒海鮮牛奶，今晚就膽粗粗試一次。四隻蛋白、1.5倍份量的牛奶、少許鹽、糖及胡椒調味、二湯匙的濕粉，拌勻後備用，配料就簡單啲用日本蟹柳切粒。燒熱鑊，下大量油（唔可以用花生油，今次用粟米油，因為得隻純欖油唔用得），放入蛋白漿，用鑊鏟不停咁兜，見差唔多有一半結就放入蟹柳，再不停咁兜至凝結就用反的方法去煮，不過今次應該係量多咗牛奶及少咗濕粉（乜計，因為用具有限），所以有瀉水的情況出現，下次再整的時候就要注意一下份量又或者用少許忌廉代替。今次炒得好滑身，味道都好好，有奶香，啲蟹柳帶出鮮味。

仲有煎鯪魚餅及一碟隔餐餸，唔係我煮就唔影啦。