小狗樂園@TKO

今日一早落大雨，搞到都唔知去邊好，結果夜晚又入去搵乒乒玩。

食完早餐走咗過海買凍肉，買完返屋企將四隻法蘭西鵪鶉解凍及去骨，用蒜泥、鹽、味醂及生抽略醃之後就去街市買咗四隻斑馬賴尿蝦，跟住就坐車入TKO啦。

乒乒出咗吉Ｘ島接我地一齊返屋企，回程途中係長廊遇上一對小朋友，最後就變成成屋都係小狗啦。

本來預咗四人兩狗食份，多咗一人兩狗之下就加多一味解緊凍都仲未知點整的羊膝。而乒乒肥肥的三天食糧就變成一天的份量。

頭盤係西班牙的豬頸火腿。

今餐所有用上食鹽的調味都用了喜瑪拉雅的岩鹽，味道的層次比用開的法蘭西海鹽或普通岩鹽更有深度，鹹味的過後是一陣輕微的甘苦味道。

焗釀去骨法蘭西鵪鶉之終極食法。

今次用法蘭西的Bayonne Ham，包上炒熟的洋蔥絲、鮮蘑菇薄片、浸發好的乾牛肝菌及草菇乾、法國鵝肝醬及少許黑松露醬。

卷好之後釀入鵪鶉內。

用竹籤封好所有開口。

用180度焗胸口向上十分鐘，轉焗背十分鐘，加大火至200度焗五分鐘，再反轉多焗五分鐘至夠色為止。切開冇拍照，因為大家對手都好唔得閒．．．

自製椒鹽斑馬賴尿蝦細的三隻就開兩段，大的一隻就開三段，開口位用生粉略封口。再用猛油（高度危險動作）炸至熟透，盛起徹底去油（油多啲蝦會唔好食的）。燒熱生鐵鑊，用油炒香蒜粒及去籽的辣椒粒，炒至香口後加鹽，將蝦回鑊，再加美極。

羊膝由於要即時整，只可以見到有乜就用乜去煮，下一次都唔會整得返呢個味，幸好C小姐家中的調味料及配料有返咁上下，唔係就真係好頭痕啦。

四隻羊膝急速解凍之後用竹籤刺孔，用鹽及黑胡椒略醃，大火煎封各面後盛起。用油炒香洋蔥塊、數瓣蒜、用剩的乾菌、紅蘿蔔塊及蘑菇，灒酒，加入雞湯，浸乾菌的水及另外煮好的蕃茄醬，再加入辣椒及雜香料（香葉、迷迭香、牛至、Masala及Paprika），用壓力煲煮廿分鐘，待自然減壓後將羊膝取出保溫，汁液就用大火收汁後調味，再將羊膝回鑊多煮十分鐘後取出去骨切粒，原本打算將肉粒跟汁液混合一起上枱，不過．．．

鮮火雞肉餡意大利餃子。

有人唔食芝士，所以得返好少選擇，一係就素餡，唔係就得火雞。意大利餃子本來是配上用洋蔥碎、蒜泥、香葉、鮮蕃茄去皮去籽切粒、一大罐長蕃茄罐頭、一盒濃縮蕃茄醬及蕃茄膏煮成的蕃茄醬。不過發覺煮羊膝的汁液更美味，最後一刻就改變醬汁。意大利餃子跟普通意粉的煮法一樣都係用鹽水去煮，跟著包裝上的時間就得，煮好就將去水的餃子轉入汁液中再煮沸就完成。

XO醬蒜泥炒翠玉瓜。用返個用開的生鐵鑊去炒的感覺良好好多。

黑松露醬牛油蒜茸包。

飯後甜點，網上疏乎厘，即搵即做。

係廚房煮飯的時候，平時廚房門口閘外只有小乒乒係度等等等，不過今日就多了大小姐不時係閘項伸個頭出來，初時真係比佢嚇一跳的，試多幾次慣咗就冇乜野。乒乒呢個時候乖了很多，因為有個姚明同佢一齊等籃板，跳都唔跳下。

食飯的時候某人話大小姐二小姐好乖的唔埋枱食飯，不過又係騙人的（已經係第三個啦）。

乒乒當然係霸著正常的位置等吃，肥肥就不時四周遊走等吃，而大小姐就不時用個鼻係我隻手旁伸出來嗅一下枱面上的味道。當我食緊隻鵪鶉髀的時候，跟大小姐有少少眼神的交流，佢就好開心咁把雙手放咗係我的右手上，又話係屋企唔係咁嘅。今日啲餸多味，唔係好啱小朋友吃，只有少許蝦肉及麵包。

．

綜合各次的觀察：小狗都是愛吃的，有的就會揀來吃，有的就唔理乜都吃，有的食完好野就返唔到轉頭，有的食極都唔飽，有的想要食個陣就六親不認，有的食夠就唔會再食，更有的唔理大份或細份有佢份就得啦．．．

如果再有人同我講佢隻小狗食飯唔會埋枱的話，大家可以估計到發生什麼事。由此推斷另一位網友吳小姐家中的動物在食飯時一定會走晒埋枱等吃，佢煮的餸菜一定唔會差得去邊．．．

．

食飽就再煎埋個件西冷，切好長條後用猛火煎香，休息後再剪小粒，配以少許鵝肝醬（不過二小姐就唔係好欣賞啦）。

二小姐全日都好Cool，佢肯走過來嗅一下手上的味道，但一摸佢個頭就會即刻走開，不過最後佢都捲曲係我的腳邊休息，乒乒就一貫的瞓咗係我的大腿上，呢個時候肥肥流露出不是味兒的眼神。

．

唔知王子最後的結局是怎樣，大小姐又有冇親自出手呢，而媽媽說的夢境又會唔會再出現呢。。。