2011新春行大運

懶了數個星期，上星期只是到山頂及到釣魚翁輕鬆散步，新一年開始決定要搵條長一點的路線行下。

今次又係跟一班行山隊去行，由石壁出分流再回大澳，全程約十八公里。呢段路第一次行已經係廿年前，當時要由梅窩坐巴士到石壁，原本打算來一個三日兩夜的露營，第一晚在狗嶺涌過夜，第二晚在響鐘坳，不過第二個營地當年冇水，要全速前往大澳，最後在長沙過夜，算係一個難忘的旅程。之後都有再行過一至兩次，不過就冇乜印象。

九點係東涌出發，坐半小時巴士到石壁起步，再等齊人已經係十點了。

初段都係石屎平路，兩旁的樹木都很高，冇乜機會拍照。

到了狗嶺涌營地入口就轉左出嶼南界碑。

呢個地點上一次來已經係十六年前了。

由界碑穿樹林下降至狗嶺涌營地。

再轉由山路上接鳳凰徑，再下沿分流郊遊徑下降至分流東灣大休。

大休之後就上分流炮台。今日有另一隊人一齊行，攪到個炮台旺過旺角。

再出石圓環。

回接分流郊遊徑行至分流村，今日士多有開門營業，不像上幾次整條村都空無一人。

休息一會就開始上響鐘坳，呢段雖然唔係好高，但次次都覺得有點吃力，因為好多時係分流村休息了一排，又正值中午至下午時分，太陽係背脊曬住急上斜都有少許辛苦的。

過了響鐘坳就向煎魚灣出發，跟大隊有一個好處就係有人會帶你去一啲難找的地方，行到沙灘盡頭就係象鼻石，附近有普濟禪院的遺址。

如果水退的話，海面會有一條沙堤過對面的雞翼角。

玩完呢部分，大部分人的體力都消耗得七七八八，大家都趕著出大澳，不過人多路窄，前行速度唔係太快。過咗牙鷹角，見時間尚可，就加快腳步出大澳碼頭睇日落，順便買少許土產出來。