20101113的晚餐@太湖大閘蟹

一年一度食蟹時間，兩個人冇乜癮，叫埋岳父岳母一齊來吃。

係九龍城買咗四隻太湖的，個阿姐好好心機幫我揀，係廿隻入面揀咗呢四隻出來。

蒸好後配黃糖，薑米及意大利醋吃。

薑米一定要切得好細粒，出面食的通常都切得好大，調出來沾汁的味道唔夠調和，即係薑有薑味，醋有醋味。多年來食蟹都轉用了意大利黑醋，味道比中式的多一點深度。

早日係別街見到一枝有機葡萄釀的白酒，清清地用Sauvignon Blanc來送蟹啦。

另外今日又整多份鹵水鴨舌及豆乾，加埋早日整好的牛腱及蒟蒻。

又再次整桂花蓮藕，今次買咗條唔係好多孔的蓮藕．．．

食埋最後一食份的山藥魚蛋。

食完蟹又再開工煮過，好耐未試過邊食邊煮，飲完酒都唔係好知做乜。

呢盤睇唔出有乜特別，係岳父指定要食的肉醬意粉，不過全部食材都係由零開始做的。肉醬係一早起身煮定，先切好晒啲洋蔥碎、紅蘿蔔粒及西芹粒，牛肉碎係用ＮＺ西冷手切的，加入碎豬肉及多種不同的蕃茄（鮮茄、罐頭長茄、罐頭車厘茄、茄膏及飲用的茄汁）及牛湯底煮兩個小時而成。由於去九龍城買蟹用多咗時間，返到來都唔係好夠時間整意粉，買咗呢部壓麵機咁耐終於可以用埋最後呢一個分唇啦，用ＫＡ搓好麵糰（200克Semolina粉、兩只蛋及少許鹽）半小時後再壓成圓條狀意粉，原本壓好的意粉應該要多放半小時才煮，不過趕時間就煮咗先啦。環保啲煮完啲水可以蒸蟹。

先放好意大利粉，舖上肉醬，加菠蘿塊及黑橄欖，再舖上三種芝士燒焗八分鐘完成。

另外又再上薄粉煎油封羊腩。

鵝油炒草頭，炒開四両，今次炒半斤，落咗鑊先發現落少咗油。

同一時間處理三味餸真係好辛苦，一邊要望下個焗爐，另一邊又要煎羊，又要炒草頭

，十分鐘內完成，不過出面枱面都未清理好．．．

食紅肉轉返枝Pinot Noir來飲，酒味比較薄，之後再開多枝Cab來飲。