一個星期的工作

攪玩廳部冷氣之後就好多野做，先係去揀咗張梳化。

上星期廁所把抽氣扇有怪聲，原來係個殼經過長年累月的日曬，啲膠都已經變質，把抽氣扇係上手留低的，夠鐘就要換。

由於抽出去個係當風位，用手抽好多時打風落大雨都唔記得關尾蓋，最後決定買個電抽，不過附近搵唔到，要去旺角買。

重新換過圍邊的膠條，加上玻璃膠之後就上抽氣扇，因為下面係馬桶，要伸長對手來做好難發力壓出去，又因為係玻璃唔可以用死力，攪咗一陣先裝得上。鮎魚一啲雨都比啲來試水，未知防水做得合唔合格。

梳化送到之後就要展開另一個工程就係將個電視掛上牆，買電視時老婆話食飯個邊都要睇，所以買咗42吋，其實個廳37-40會更適合。一直以來都係放係有轆的地櫃上，食飯就轉過去。現在問題就來啦，有梳化轉的角度少了一點，另外坐係梳化上面隻眼睇得唔係好舒服，加上距離比建議的近了幾吋，睇個陣都要郁少少個頭。

最後又要搵一啲資料去計返個合適高度，原來最合適的高度係眼平係屏幕的中心的上下十五度範圍內，因為坐梳化個頭會向後傾少許，所以用眼平高度就可以啦，結論係現在放在電視櫃的高度係矮咗四吋幾，唔怪得睇得唔舒服啦。

平平地去鴨寮街買咗個雙臂架，呢個架收平離牆只有三吋的距離，佢可以再埋一點的，不過背後的電線轉唔到咁急的彎。

經過上一次將另一部32吋裝係睡房牆上的教訓，今回就非常小心去劃位。要對正六口撞爆鏍絲唔係一件容易的事情，特別係上下的孔口相差十三吋，只要上面的一排鑽孔有少許的偏差，下面的就會對唔正，而且仲做唔到水平的效果。

呢個就係坐係梳化眼平的位置睇到的效果，部電視遠多三吋多，睇時真係舒服好多。最後的問題就係個抽訊號線、一對喇叭及日間側光的問題。