無聊出街又破財

呢個月都係忙個不停，唔係坐定定成日對住部電腦作文就係出街四維走。

昨日Ｃ小姐打來問去去一年一度的約會，約實咗又唔記得搵林太。

今年轉咗落Ｂ２，地方大了，不過人太多好焗。

排隊中買多個三十的蛋形煲，今次要黑色，粗用的唔想再買有顏色的。

照例九時去到，一時才走得。

買完去世貿食晏，韓國菜。

當然係試下人地點整啲牛，牛肋骨，肉質當然係自己係凍肉店買的靚，但發現原來牛肋骨唔開花係好韌的，佢唔係全部冇開花，只係有兩塊切漏咗，先至搵得出呢個分別。自己一開始就跟正宗的做法，真係冇諗過個分別係咁大的。

老婆叫的炆牛肉，個汁係商業式濃甜個種，但底味唔夠厚，味道浮誇了少許，我反而喜歡住家式的清淡一點但底味扎實些，食後可以回味一下而不需即刻飲水去洗刷味蕾。

最後有茶或咖啡，初聽以為係月桂茶，再問之後聽清楚原來是肉桂茶。

唔食肉桂味的就唔好試啦，呢個份量唔係太多人頂得住的。