哀2

睇完一大堆資料先知道事件的小部分．．．

悲劇的疑點很多．．．

．

其實大家可能對菲律賓呢個國家有一些不合理的期望，以一個過高的社會標準加於一個第三世界國家身上．．．係東南亞各國中，菲律賓一直以來都係在我的旅遊名單上最後的一位，要去的唯一原因都只會係為了完成全部東南亞各國之旅。

．

我會由事件的開始一直看下去，而不是一般人由結果向前推算．．．

．

一開始就唔知點解個鎗手可以上到車，呢個係鎗手跟司機有沒有串通的研究課題。就算冇串通，一個持步鎗的人要上車，相信一般人都冇辦法阻止。所以關鍵點唔會係這處。

．

綜合司機的口供跟車上女孩的資料，那位太激動女士的言論暫時唔理會，事件開始時應該是比較和平的，所以談判的當初係冇需要殺死個鎗手，即係所有人成日問點解唔一早開鎗個理據唔充分。問題就係出係個申訴專員身上，點解要十日內覆核個案而非即時處理，即係將人質的生命安危置之不理，最大責任應該係呢位專員身上。如果鎗手得知申訴即時處理，往後的慘劇好大機會唔會發生。

．

第二個關鍵時刻就是比鎗手見到佢個細佬比人帶上手扣押走的一幕，呢個係司機口供上提出的一個重要時刻，那位女孩亦曾經提到鎗手係忽然轉變態度。有一點好重要的是車上個電視係可以看到新聞的，鎗手係對外的通訊都曾發出過佢知道有特警係附近。係大家要求新聞自由的同時，我地有冇需要將自己變成現場的旁觀者呢？一個記者的天職係要報導事件，而不是去參與事件，雖然現今香港的傳媒已經不再客觀，但呢個原則相信冇人會去反對的。如果入面係一班有訓練過的恐怖份子，相信就算係以色列的特種部隊係呢個情況之下都會失敗。經過呢次不幸的事件之後，大家要再諗下當我地再遇上呢啲情況，有冇需要實時的現場直播，又或者係透露幾多行動上的資料，個平衡點會係邊度等等都值得大家去反思。

當鎗手開始殺人的時候，司機唔知點解指甲鉗都可以開到個手扣，究竟係個指甲鉗勁定係手扣差就真係唔知啦。佢得知個消息只會係片面，因為司機位係比客坐的位置低，只會見到前排的情況，應該係聽到個鎗手要殺晒所有人，而門前即旁邊的導遊又死咗，鎗手一直向後走，見有得走就走都係人之常情，至於個指揮官點解會完全相信佢個消息就大家都明白係乜野一回事，蠢。

．

往後的發展大家都好清楚，成班所謂特警的表現已經有好多專家分析過，唔再寫啦。

．

呢位總統都係後知後覺個種，成個國家的政府體制都係咁上下，唔可以奢求佢比得幾多野出來。下半旗，副總統加部長一齊上京請罪應該都補救唔到幾多。

．

最後要表揚下位領隊，佢係呢個環境之下都可以做返佢本份，已經係好難得的一件事啦，亦都可以比啲阿珍類的導遊了解一下香港的核心價值唔係等於一張三粒星的身份證。