Party @ Chritie's Home (魚蝦蟹) 〔附食譜〕

星期六,本來打算去creamy媽屋企搗亂,不過因為佢屋企冇個大焗爐,就轉移陣地過咗christie處啦.

http://hk.myblog.yahoo.com/jw!aGDoUe6UEQO_WdIkFK_QZceh5Q--/article?mid=8

冇時間影相,啲相係kelly媽處.

http://hk.myblog.yahoo.com/jw!KQ7BZiSGERXejrP4oprV/article?mid=856

星期六早上,經歷過大逃亡之後同係青衣曝曬一小時後,身心俱疲,食完"早餐"後落咗九龍城行一圈,一心想望吓有乜野比當晚用,十二點幾搵Creamy媽,佢話kelly未睇完醫生,叫我等下先.於是兩個人就傻下傻下係九龍城行咗一陣,見到樣樣都想買,但又唔敢買,因為比人放過幾次飛機,每次都要一個星期先清得晒

,所以唔confirm就死都唔買野.行咗成個鐘,開始汗流浹背,就慢慢行返屋企,返到屋企樓下就收到Creamy媽話食啦食啦,咁我就問佢幾多人同筆直幾多啦,佢話7~9個,每人100啦,食乜你話事,咁我話要快啲confirm人數,唔係買唔到野嫁.

返到屋企放低野後再到附近街市望下有乜東東合用,點知二點鐘,個個係到娛樂緊,冇蝦同魚買,跟往就即刻坐車落TST兩大超市買食材,行咗"歡迎"一陣見冇乜value for money的東西就過咗去"城市"睇,700~900筆直食排就唔使諗,雪藏又解唔切,都係海鮮啦,行到魚缸,見到有兩種蟹,登格斯@220同brown crab@160,買2 x 登格斯好還是3 x brown crab好呢?前者就肉好食,後者就膏一流,9個人都係3隻有睇頭啲,就係咁隻蟹就做咗當晚的focus啦.剩係得蟹,唔夠飽肚喎,跟住就行返去"歡迎"睇有冇啲平牛肉煮個肉醬意粉啦,經過一輪運算之後,見到有幾塊mark down咗嘅澳洲空運肉眼排,啲肉色都冇問題,又冇乜血水,就買晒返去煮肉醬,反正我買啲碎牛都唔知佢地用乜啦,都係信自己多啲.

買晒配料之後就返屋企煮肉醬,望吓個鐘已經四點幾,煮個醬要1.5hr,準備要半小時左右,就先煮肉醬,後整其他野...做完一大堆preparation之後都差唔多七點啦,本來打算坐小巴轉的士去的,但最後都係試下豪一次,的士直入啦.

入到Christie屋企,打量咗個廚房一陣先至開始工作,原來佢個廚具都好齊,放心開工啦.當日菜單如下:

頭盤: 凍蝦伴他他汁 及 沙拉(by Creamy ma)

意粉: 澳大利亞牛肉醬意粉

主菜: 泰式上湯浸鰂魚 及 清蒸brown crab 伴意大利黑醋

伴菜: 芝士(煙肉)焗蘑菇

甜點: NY Cheese Cake (by Kelly ma)

飲品: 紅酒什飲

(Recipe)***

凍蝦：新鮮蝦洗淨，燒熱一大鍋水，加入鹽、(西芹、洋蔥、紅蘿蔔)切大粒、黑胡椒數粒、香茅切段及檸檬數片，水沸後再倒入蝦隻，煮熟後將蝦隻放入冰水中冷卻，待蝦隻完全冷卻後盛起放入雪櫃內保存．

他他汁：將白汁一瓶、(sweet)醃青瓜數條切細粒、1/4個洋蔥切細粒及新鮮蕃茜切碎吸去多餘水份混合後伴入適量的醃青瓜水，再加入小量拔蘭地即可．

牛肉醬：牛排兩磅切粗粒用鹽及胡椒醃勻後炒香去水備用，(西芹、洋蔥一個、紅蘿蔔)(份量約2:5:4)切細粒，先炒香洋蔥粒再加入蒜泥半個，加入香葉2片、乾辣椒1隻、(牛膝草、百里香及羅勒)各1茶匙、西芹粒及紅蘿蔔粒炒數分鐘，加入蕃茄膏一小罐後炒至乾身，灒紅酒，加入牛肉拌勻，再注入上湯約一杯、去皮蕃茄一罐及蕃茄汁一罐，下糖一湯匙、黑椒碎及鹽調味，慢火加蓋煮1.5小時，其間要不時攪拌．最後用麵糊調至適當濃度及加入去籽去皮切粒蕃茄二個後略煮片刻．

上湯浸鰂魚：鰂魚兩條洗淨後吸乾水份備用，煮熱雞湯，加入香茅二枝切段、咸檸檬一個、草菇十數粒、檸檬葉數片及青檸一個切半，待煮沸後加入鰂魚，再加入黑椒碎及檸檬數片即可．

Brown crab：反轉蟹隻大火蒸廿分鐘後即可，如要凍食就在室溫冷卻後放入雪櫃便可．

意大利黑醋：薑切極細粒後加糖及醋即可．

芝士煙肉焗蘑菇：蒜泥用油炒熟後備用，煙肉炒香後混合蒜泥放在蘑菇面，灑上鹽(如有煙肉可省去)及胡椒粉，再舖上芝士後用高火焗至金黃便可．

紅酒什飲：蘋果、橙、檸檬及西柚切粒後用少量拔蘭地(及生果味烈酒)醃一至兩小時，加入罐裝濃縮橙汁一罐，混合凍七喜(1.25L+)及凍紅／白酒(750ml)，加入適量冰塊即可．