是日清明節,不過唔係去拜山,而係出發去曼谷"玩"四日.
天呀,點解要坐九點機呀,七點到機場集合,仲要四點九起身
,以前個機場係啟德就飛的都係有限錢,依家都係搭機場巴士去好啲啦,但平極都要38x2
.仲以為頭班車好鬆動,點知一上車,哇,點解咁多行李嫁,我個32吋喼放邊呀...
,唯有乖乖地做埋個砌櫃員先啦,左砌右砌先砌好個喼
...跟住仲大件事,樓上一個位都冇,唔係要企到機場呀,好在車尾有兩個倒頭位,總好過冇啦
,不過要做石膏腳八個字咁多啦.
一到機埸,點解啲人仲多過旺角,唔睇錶仲以為係黃昏添...見到咁多人都知要排隊啦,但估唔到咁長囉,出事點唔係check-in位,而係過入境處同保安,依道個道過關都係咁長龍,仲要過保安條蛇餅排到貼晒個入境處counter,我諗啲入境處人員個背脊都好大壓力
.幾經辛苦終於過到關,但係剩低七個字就上機,大x樂同漢堡皇條龍都唔短,食早餐都唔夠時間,唯有咬住杯星巴黑上運輸帶...去到閘口剛好上緊機,係香港坐咁多次飛機出外都未試過咁趕
,又話個機場擴充嘅,點解都仲唔係咁夠用嫁,一早都已經係咁,晏啲peak時個啲人都唔知要排幾耐囉.
國泰,一個都唔知係愛定恨的品牌
,愛嘅都仲算係香港人的航空公司,恨嘅就係點解對自己同胞都咁差,明明係本地人,位位華籍空姐都要同你講英文,明明之前你同鄰座講緊粵語,但係掛住粵語牌的都係講一輪好似好流利的英文,你同佢講粵語時佢先會同你講返粵語,不過下一次再同你講都係英文行先...雖然English, I know,但係假期都係用番母語好啲,至少其他航空公司啲講華語嘅機艙服務員見你係中國人都會用普通話或粵語同你講,親切啲嗎. 仲有搭左咁耐飛機都係第一次遇上"shortage of landing card",唔係一兩張,係要出announcement個隻先至好嘢嗎, CX ,你係得嘅!
返來個時仲得意,派一個艙嘅餐都要大半個鐘,仲要有啲有雪糕,有啲冇,收完餐都係澳門出面啦,如果比當年去台灣個班超級機艙服務員見到,都唔知點睇囉,可能佢地話,咁嘅速度,不如係桃園攞行李度派啦.三次搭國泰,三次都有啲唔係咁好的經驗,第一次就壞機,台北返來要五個鐘;第二次就special request個飛機餐唔知去左邊,睇黎都係同國泰個八字唔夾,少搭為妙.
途中廣播話曼谷35度,即刻嚇左一跳,身上個件厚衫...朝早起身只有十幾度,半夢半醒咁就去咗機場,中下中下就入咗閘上咗飛機,聽完個廣播就即刻醒晒,二個鐘頭飛機就好似由北極飛到沙漠咁
沒有留言:
張貼留言